Fituesit e çmimeve të panairit të 10- të të librit “Tirana 2007”

Gjatë kësaj ceremonie, 5 ishin çmimet që iu akorduan fituesve, çmime që u dhanë nga juri të ndryshme.
Dy prej këtyre çmimeve u shpallën nga Juria e e Shoqatës së Botuesve Shqiptarë:
Çmimi “Shkrimtari i Vitit 2007” dhe Çmimi “Përkthyesi i Vitit 2007”.
Në edicionet e mëparshme, çmimin “Shkrimtari i Vitit” e patën merituar shkrimtarët: Fatos Kongoli (2005) dhe Vath Koreshi (2006).
Ndërsa çmimin “Përkthyesi i vitit” e patën marrë përkthyesja Edit Dibra (2005) dhe përkthyesi Shpëtim Çuçka (2006).
Përveç këtyre çmimeve, si edhe në dy edicionet e mëparshme, nga Juria e UNICEF -it dhe e organizatës MJAFT u shpall libri më i mirë për fëmijë për vitin 2007, çmim që mban emrin e shkrimtarit të madh e të paharrueshëm Odhise Grillo.
Juria e gazetarëve të Kulturës shpalli “Stendën me paraqitjen më të mirë në Panair” dhe një Juri specialistësh në fushën e grafikës, shpalli çmimin “Libri më i realizuar grafikisht dhe estetikisht i paraqitur për herë të parë në këtë Panair”.

Nga katër shkrimtarët e nominuar për çmimin “Shkrimtari i Vitit 2007”:   - Ylljet Aliçka - Ridvan Dibra - Diana Çuli - Luljeta Lleshanaku     Juria e Shoqatës së Botuesve Shqiptarë shpalli si më të mirën shkrimtaren Diana Çuli për romanet “Engjëj të armatosur” dhe “Gruaja në kafé”.

Nga katër përkthyesit e nominuar për çmimin “Përkthyesi i Vitit 2007”:   - Afrim Koçi - Xhevat Lloshi - Donika Omari - Abdurrahim Myftiu     Juria e Shoqatës së Botuesve Shqiptarë shpalli si më të mirin përkthyesin Abdurrahim Myftiu për përkthimin e veprës së autorit Misha Glenny “Histori e Ballkanit”.

Nga katër librat e nominuar për çmimin “Odhise Grillo”:   - “Bardhoshi Xhepkokoshi” nga Adelina Mamaqi -  “Ku ta gjej pranverën” nga Ferhat Çakërri, - “Reja xixëlluese” nga Nexhmije Muça -  “Vallëzimi i qershizave” nga Shkëlzen Zalli      Juria e UNICEF-it dhe MJAFT shpalli më të mirin për vitin 2007 librin “Ku ta gjej pranverën”, shkruar nga Ferhat Çakërri.

Nga katër të nominuarit për çmimin “Stenda me paraqitjen më të mirë në Panair”:     - Stenda e Shtëpisë Botuese DITURIA - Stenda e Shtëpisë Botuese OMBRA GVG - Stenda e Shtëpisë Botuese ALBAS - Stenda e Shtëpisë Botuese IDEART     Juria e gazetarëve shpalli si më të mirën stendën e Shtëpisë Botuese OMBRA GVG.

Nga katër të nominuarit për çmimin “Libri më i realizuar grafikisht dhe estetikisht i paraqitur për herë të parë në këtë Panair”.   - “Evropa Ballkanike” - Shtëpia botuese “Dituria” - “Vepra” e Ismail Kadaresë - Shtëpia Botuese “Onufri” - “Vepra e At Zef Valentinit” - Shtëpia Botuese “Plejad” - “Seria e Botimeve Psikologjike” - Shtëpia Botuese “Ideart”     Juria e specialistëve të grafikës shpalli si më të arrirën paraqitjen grafike që Shtëpia Botuese Onufri i kishte bërë Veprës së Ismail Kadaresë, paraqitur për herë të parë në këtë Panair.