LIBRI SHQIP NË PANAIRIN E SELANIKUT

LIBRI SHQIP NË PANAIRIN E SELANIKUT   Nga Shqipëria mori pjesë Shtëpia Botuese Toena dhe shkrimtari Fatos Kongoli .   Është viti i 5-të radhazi që zhvillohet kjo veprimtari, e cila qëndroi e hapur deri në datën 2 qershor 2008. Organizatorë të kësaj veprimtarie ishin Qendra Kombëtare e Librit Grek, Shoqata e Botuesve dhe Librave të Greqisë së Veriut dhe HELEXPO (Qendra e Organizimit të Panaireve  për Greqine e Veriut). Kjo veprimtari, për të pestin vit radhazi u mbështetet fuqimisht nga Ministria e Kulturës së Greqisë. Pretendimi i organizatorëve për ta kthyer panairin ndërkombëtar të librit në Selanik si pikëtakimin më të rëndësishëm të librit për gjithë Evropën Juglindore duket se po bëhet realitet, sepse në këtë edicion, që shtrihet në një sipërfaqe prej 12.000 m2, morën pjesë botues nga më se 50 vende të ndryshme të botës. E ftuara e veçantë e këtij edicioni ishte Franca, e cila u paraqit me një stendë përfaqësuese madhëshore. Nga Shqipëria u përfaqësua me stendë të veçantë Shtëpia Botuese "Toena" e Tiranës (Salla nr.14, stenda nr.12 a). Librat që ajo ekspozoi në këtë panair kanë ngjallur interes nga vizitorët e shumtë shqiptarë në emigracion. Në mënyrë të veçantë botimet me temë nga historia, botimet për fëmijë dhe letërsia artistike, kryesisht romanet nga autorët më të njohur. Nga autorët më të kërkuar janë Fatos Kongoli, romani i Ben Blushit "Të jetosh në ishull", Diana Çuli etj. I ftuar i veçantë në këtë panair është edhe shkrimtari Fatos Kongoli, për të cilin do të organizohet edhe një perurim i romanit të tij "Jetë në kuti shkrepsesh", i sapobotuar në gjuhën greke nga Shtëpia Botuese ALDE. Takimi me shkrimtarin Fatos Kongoli. në stendën e botuesit të tij në greqisht ALDE, do të organizohet ditën e dielë, me datën 1 qershor 2008, ora 13.30 - 14.30. Ky është romani i tretë i Kongolit në gjuhën greke. Më parë janë botuar "Ëndra e Damokleut" nga shtëpia botuese "Kedros" dhe "Kufoma" nga Shtëpia Botuese "Kastaniotis". Një roman i katërt i tij, "Lëkura e qenit" është në proces botimi nga shtëpia botuese "Patakis". Mbi 150 veprimtari me librin u organizuan gjatë ditëve të Panairit të Selanikut. Pjesa më e madhe ishin takime me shkrimtarët e ftuar dhe përurimet e librave të reja, por edhe diskutimet e debatet për pozitën e librit në kohën e sotme, mundësitë e bashkëpunimit rajonal etj. Një prej veprimtarive më të rëndësishme ishte tryeza e rrumbullakët me organizatorët dhe përfaqësuesit e Çmimit "Ballkanika" (romani më i mirë i Ballkanit), ku veç botuesve që përfaqësua vendet respektive të Ballkanit morën pjesë edhe shkrimtarët fitues të këtij çmimi në vite, si Vladislav Bajac (Serbi), Fatos Kongoli (Shqipëri), Alek Popov (Bullgari), Pavlina Lazarevska (Maqedoni), Can Oz (Turqi), Vasile Andru (Rumani) etj. Komisioni organizator i Çmimit "Ballkanika"  diskutoi edhe për mundësinë e zgjerimit të këtij çmimi në të gjitha shtetet ballkanike. Botuesi shqiptar që përfaqësoi Shqipërinë në këtë çmim ishte Shtëpia Botuese Toena e Tiranës.   ZYRA E SHTYPIT E SHTËPISË BOTUESE TOENA