Panairi i 10-të i Librit “Tirana 2007” 14-19 nëntor

Sabri Godo              Fatmir Toçi

Çelen dyert e Panairit të 10-të të Librit

Midis të pranishmëve Kryetarja e Kuvendit Jozefina Topalli, ish-Presidenti i Republikës Rexhep Meidani, por edhe shkrimtarja e deputetja Diana Çuli.
Shkrimtari dhe politikani Sabri Godo mbajti fjalën e çeljes, ku midis të tjerash theksoi: “Teknologjia e avancuar e ka shtrënguar librin. Ne shohim me keqardhje, se bijtë e nipat tanë nuk kanë të njëjtin vullnet si ne dikur, për ta gdhirë me një libër. Nuk jam kundër tyre, por them se libri përmban tërë diturinë dhe këtë nuk ka kush ta zëvendësojë”. 
Kryetari i Shoqatës së Botuesve dhe drejtuesi i “Toena”-s, Fatmir Toçi, gjatë ceremonisë së çeljes kërkoi më shumë mbështetje për librin nga institucionet shtetërore. Ai vlerësoi vullnetin dhe pasionin e botuesve, që  me punën e tyre bënë të mundur edicion pas edicioni panairet, por edhe punën krijuese të autorëve, që gjithashtu i mban në jetë pasioni i tyre. Por, të gjithë këta mbijetojnë, falë interesit në rritje të lexuesit shqiptar dhe ky panair është një hap më shumë për të kthyer kryesisht të rinjtë te libri dhe te dituria.
Siç tradita e do, pas një ceremonie apo prerje shiritash është një vizitë në stendat e panairit, ajo që e ka radhën. Dhe Kryetarja e Kuvendit Jozefina Topalli ka preferuar të mos humbasë aspak kohë, duke qenë me gjasë edhe e para vizitore e panairit që mori dhuratë libra nga botuesit, stendat e të cilëve vizitoi. 

Kryetarja e Parlamentit Jozefina Topalli dhe botuesja Flutura Açka

Jubile, dhe rëndësia e tij duket të jetë jo e vogël. Panairi më i rëndësishëm i librit ndër shqiptarë u zhvillua nga 14 - 19 nëntor te Piramida që u bë mikpritësja e vizitorëve të tij. Po ç’do të thotë për botuesit, pa të cilët s’do të mund ta rroknim këtë edicion të 10-të të tij. Domethënia e tij është tepër e madhe, sidomos kur sheh që aty janë jo vetëm “Toena”, “Dituria”, “Ombra GVG”, etj., por edhe “Faik Konica” e Prishtinës, por edhe “Logos-A” apo “Vatra” nga Shkupi. Janë barriera të kapërcyera prej vitesh tanimë, e megjithatë ende nuk ka ardhur koha të mos shihen me kureshtje. Por, vlera tejet e madhe që ka libri në shoqëri pranohet edhe prej atyre që heshtin. Është dashur shumë mund për të arritur në këtë dhjetëvjetor të mbajtjes së Panairit të Librit. Petrit Ymeri ka gjetur pikërisht ditën e hapjes së këtij panairi për të ritheksuar edhe një herë mbështetjen që mungon për librin. Ndaj edhe u shpreh: “Dua të ritheksoj edhe një herë faktin që duhet mbështetur libri nga qeveritë, pa dallim ngjyre. I gjithë sistemi libror ka nevojë për mbështetje, që nga botimi e deri te libraritë, shpërndarja dhe mbështetja e aktiviteteve librore, e cila njeh zigzage nga më të çuditshmet deri më tani”.
Por, janë botuesit shqiptarë, ata që kanë vullnetin e mirë për të paraqitur çdo gjë bukur në stendat e tyre, sidomos edhe të këtij panairi. E ajo çka kërkohet nga disa prej tyre, është shndërrimi i Panairit të Tiranës në ndërkombëtar.

Botuesit në Panairin e 10-të të Librit

Petrit Ymeri Shtëpia botuese “Dituria” - Tiranë   “Kjo është ngjarja më e rëndësishme në botën shqiptare të librit. Është Panairi i 10-të, një jubile për ne, e si i tillë, normalisht, duhet të kishte një vëmendje shumë më të madhe. Ky panair është i rëndësishëm, pasi të gjithë botuesit mund të tregojnë në këto stenda arritjet e tyre të një viti, që ka qenë një vit mjaft i lodhshëm si për ne dhe për librin.”

Gëzim Tafa Shtëpia botuese “Ombra GVG” - Tiranë   “Po, ky është një jubile, e kjo do të thotë se jemi një dekadë me librin, një dekadë me këtë organizim. Në 10 vjet ka ndryshuar i gjithë koncepti në lidhje me veprimtarinë e librit, i gjithë koncepti mbi botimet, por mbi të gjitha është emancipuar botuesi dhe lexuesi ka një informacion bashkëkohor, të pacensuruar. Pra, secili sjell në konceptin e tij një dekadë. Ky është një dhjetëvjeçar që s’mund të quhet më vogëlush, por që në vetvete libri shqip ka fituar fizionominë e tij dhe po krijon tiparin e tij themeltar.”

Luan Pengili Shtëpia botuese “OMSCA-1” - Tiranë   “Ky panair është më i rëndësishmi për botuesit shqiptarë dhe me plot bindje mund të them se ky është suksesi i të gjithë botuesve shqiptarë. Në këto stenda, shtëpitë botuese përcjellin vlerat e tyre më të mira, dhe rëndësia më e madhe shkon për botimet më të mira të vitit. E kjo është një ndeshje mes shtëpive botuese, por sidomos një përballje e rëndësishme me lexuesin. Pasi, duke u gjendur para një morie librash, do të mund të bëjë diferencën, duke bërë zgjedhjen e tij.”

Latif Ajrullai Shtëpia botuese “Albas” - Tiranë   “Panairet janë gjithmonë shumë të rëndësishëm për botuesit, por sidomos për ne shqiptarët paraqitet i rëndësishëm, sidomos Panairi i Tiranës, pasi është i veçantë. Por, personalisht, do doja që në këtë panair të ishin edhe shtëpi të tjera botuese, jo vetëm të librit shqip. Nëse do të bëja krahasim me atë të Prishtinës, Tetovës apo Shkupit, ky është më i miri që ne shqiptarët mund të organizojmë. Por, sivjet vërehet një ndryshim tepër i madh, pasi është kuptuar që nëpër panaire ajo çka është gjëja më e rëndësishme, është që libri të promovohet, dhe jo vetëm të shitet. Botuesit kanë kuptuar që panairet janë vendet ku duhet të bëhen prezantimet e librave, ku duhet të takohen autorët. Ajo që kërkoja në këtë pikë ku jemi është që në Tiranë të mos e kemi panairin vetëm shqiptar, pasi i kemi kapacitetet dhe mund të thërrasim botues nga e gjithë bota.”

Nazmi Rrahmani
Shtëpia botuese “Faik Konica” - Prishtinë

“Secili panair ka një rëndësi të posaçme, por ky i dhjeti është jubilar dhe shënon rritjen e veprimtarisë botuese në përgjithësi. Ndaj edhe për ne, që jemi përherë në këtë panair, është me rëndësi të veçantë, pasi mundemi që edhe këtë vit të përcjellim botimet më të reja, por dhe ato më të rëndësishmet e viteve të shkuara. Edhe këtë vit, tradita e shtëpisë sonë botuese për kryeveprat e shkrimtarëve më të rëndësishëm shqiptarë s’do të mund të mungonte.”

Gentjan Gjonaj
Shtëpia botuese “Bota Shqiptare” - Tiranë

“Dëshira për të nxjerrë sa më shumë tituj e për t’i pasur në Panair, besoj është një dëshirë e të gjithë botuesve, por kjo dëshirë nuk ka qenë qëllim në vetvete. Ne kemi rendur si pas cilësisë së librave, ashtu dhe pas përmbajtjes së tyre. Qëllimi ynë ka qenë të sjellim në Panair sa më shumë tituj cilësorë.”